بعد انقطاع الارسال عن القناه الاولى المصريه غرقت فى دهشتى وتسائلت لماذا فى اول مره اشاهدها بعد فتره طويله يحدث معى هذا بحثت على جميع القنوات الفضائيه لعلى اجد خبر اعرف منه ما حدث او على الاقل اعرف صاحبنا كان هيقول ايه?

تجاهل تام من جميع القنوات لمده اربع وعشرون ساعه تعبت من البحث ولكن تانى يوم الصبح قلت اشوف الاخبار فى الصحافه لعلى اجد ضالتى وكانت المفاجئه

بالبنط العريض (اختفاء السيد الرئيس)

ايه اختفاء السيد الرئيس!!!!!!!!!!!!!!!!!!!!. 

تفاصيل الخبر

فى ظروف غامضه بعد توجهه لالقاء كلمه فى مبنى التلفزيون اختفى سيادته فى ظروف غامضه

معقوله طيب والحراسه والدنيا اللى بتبقى مقلوبه فى اى مكان يتواجد سيادته فيه ازاى يختفى ومين ورا اختفائه ؟؟؟؟؟؟؟؟؟؟؟

بس يا جماعه ده كان بدا خطابه بالفعل ازاى يتخطف من مبنى الاذاعه والتليفزيون  ده اكتر مبنى متامن بعد قصور الرئاسه لان من يملكه يملك البلد فما بالك والرئيس كمان مشرف ده اكيد كان على أعلى مستوى من ألامان

بصراحه انا فى الاول فرحت اهه على الاقل هنرتاح منه لكن يا ترى مين اللى خطفه ؟

كده يبقى عندنا سؤالين

السؤال الاول ياترى كان هيقول ايه ؟

والسؤال التانى ياترى مين اللى خطفه؟؟

فضلت تايه كام يوم بين الفضائيات والقنوات المصريه وانا مشغول ومش انا بس ده كل مصرى اعرفه هنا وبعدين قررت العوده لمصر لانى سمعت ان فيه اضرابات ومظاهرات وانا فى الطريق من المطار اشتريت الجرايد اللى وحشتنى ومن مده كبيره ما ضيعتش فلوسى فيها

المهم اشتريتها واتفاجئت مفاجأه جننتنى الحزب الوطنى مغرق الدنيا دعايه لجمال مبارك ابن الرئيس المخطوف اللى كل الشعب المصرى بعدما شاف منه الويل بين يوم وليله تعاطف معاه وانشغل لدرجه انه مش حاسس باللى بيحصل فى البلد

وعلى استحياء يعلن مجلس الشعب ورئيسه اللى حل محل المخطوف انهم يرشحوا جمال مبارك رئيسا لجمهوريه مصر العربيه وده تعاطفا مع الاب المسكين المخطوف

معقوله يا جماعه مصر تتورث تعاطفا مع واحد خنقها اكتر من خمسه وعشرين سنه 

اللى جننى اكتر ان اغلب الكتابات والمقالات مركزه على العطف والمن على جمال ولازم نسلمه مكان المخطوف والكل ناسى المخطوف نفسه

عرفت ان الطريق من المطار للمنصوره مغلق بسبب  المظاهرات وطبعا قوات الامن المركزى ومكافحه الشغب شغاله الله ينور (لسه فاكرها وعلاماتها لسه واضحه فى كل حته من جسمى)المهم

فكرت اركب عن طريق بلبيس الصحراوى وفعلا لقيته ماشى وطبعا البنديره اضعاف مضاعفه علشان اللبش اللى فى البلد الاستغلال ورانا ورانا

المهم

  أمام احدى قرى بلبيس لقيت قوات مكافحه الشغب شغاله ما شاء الله بمنتهى النشاط السواق خاف على عمره وحب يرجع للقاهره فكرت انزل واحاول اعدى من وسط المعركه واركب اى مواصله من الجهه الاخرى حاولت اتفادى ضرب النار اللى شغال فى كل مكان واخدت طرق جانبيه لحد ما حسيت ان الجو هدى شويه وانا كمان تهت

قابلت احد الفلاحين وسألته على الطريق دلنى عليه وحزرنى من طريقان احدهما يؤدى الى مكان الاشتباكات والاخر يؤدى لمنطقه مجهوله ولكن عليها حراسه مشدده واللى بيقرب منها بيتقبض عليه!!!غريبه هنا فى المنطقه دى حراسه مشدده طب على ايه؟

دى منطقه زراعيه وكلها اراضى استصلاح؟ 

حب الاستطلاع والفضول دفعنى الى هذا المكان المحصن مش عارف ليه يمكن القدر هو اللى رمانى هناك

لقيت مزرعه كبيره محاطه باسلاك شائكه وعليها فعلا حراسه مشدده قربت شويه لقيت جوه حركه غريبه ناس رايحه وناس جايه منهم لوائات شرطه ومنهم مشايخ بدقون!!!

 لكن دول اكتر من السمن على البتنجان الاسود معقوله ماشيين مع بعض ؟

يا ترى ايه لم الشامى على المغربى دول بينهم ما صنع الحداد؟

فضولى وغبائى خلانى افكر انى ادخل جوه بس ازاى دى محصنه ولا الطابيه فضلت مراقب المكان من بعيد وبحاول افهم من حركاتهم ايه اللى بيحصل

لاحظت انهم بيجتمعوا فى كل صلاه رجال الداخليه ورجال الجماعه الدينيه فى مسجد على طرف المزرعه للصلاه

سامحنى يا رب مضطر انى استغل بيتك فى التسلل للمكان الغريب ده الفضول هيقتلنى

قبل الفجر بساعه الحراسه خفت شويه قربت واحده واحده ومن بين الشجر تسللت للداخل وانا مش مصدق نفسى انى بقيت جوه وفى نفس الوقت مرعوب

يعنى يا ربى ارجع من اخر الدنيا علشان اترمى الرميه دى

المهم دخلت الجامع بسم الله ماشاء الله مجهز على اعلى مستوى غريبه مزرعه فى الصحرا ويبقى فيها مسجد مجهز بالشكل ده؟

 سمعت حركه على باب الجامع جريت بسرعه على الحمامات ليتها سوبر لوكس معقوله فى الصحرا دى !!!!!!!!!!يمكن

وفضلت محبوس جوه الحمام لحد ادان الفجر طبعا بقالى كام يوم متبهدل ودقنى طولت شويه واثناء الصلاه خرجت وتهت فى وسط المصلين ودول ما شاء الله كتير

بعد الصلاه خرجت طبيعى فى وسطهم ولقيت نفسى فى وسط المزرعه مزرعه كبيره لكن خايف امشى كده ولا كده الناس دى شكلها مش سهله ربنا يستر فى وسط الزراعات لقيت فيلا صغيره وعليها حراسه مشدده قربت منها بحزر والساعه 8صباحا شفت اللى عمرى ما كنت اصدقه لو حد حكاه ليا الرئيس مبارك خارج يجرى ويلعب رياضه معقوله انا اكيد بحلم بس معقول كل ده حلم لالالا انا واعى ولسه مصلى الفجر لقيته بصحه جيده وبيجرى بس بصراحه وشه متغير وخاسس بحكم الزمن اللى ساب عليه علامات وطبعا ما بنشفهاش فى الاعلام امال ايه الاشاعات اللى كانت طالعه دى انه مريض وبيموت ولا كان مقصود بيها ان الناس تتعاطف معاه؟ 

فكرت فى طريقه انى اكلمه نفسى اعرف ايه اللى حصل ونفسى اعرف الخطاب اللى اتمنع كان هيقول ايه ومين له مصلحه يمنع خطاب الريس وكمان يخطفه ويخبيه هنا فى اخر الدنيا ؟؟؟؟؟مين؟؟؟؟؟؟؟؟؟

لاحظت انه بيجرى فى دائره كبيره حولين الفيلا وفيه منطقه خلف الفيلا العيون قليله فيها قربت وناديت عليه

بصراحه ناديت بكل ادب يا سياده الريس (والحمد لله ما طلبتش المنحه)بص باستغراب وشاور لى انى افضل مكانى

 قلت له بصوت ضعيف يا ريس هو ايه اللى بيحصل مش انت مخطوف؟

بدأ يمارس العاب سويدى وهو بيكلمنى بضهره وقالى ايوه بس خليك مكانك علشان الحراسه

سالته ازاى يا ريس تتخطف من قلب مبنى التلفزيون ؟

فين الحراسه وفين الامن؟

ومعقوله لسه مش عارفين يوصلو لمكانك انا وصلت لك بسهوله؟ 

قالى ياابنى اللى خاطفنى مش غريب المهم طمنى ايه اللى بيحصل فى البلد؟

قلت له يا ريس جمال هيستلم البلد والناس كلها متعاطفه معاه بعد اللى حصل لك

بس لو سمحت يا ريس ممكن اسالك سؤال ؟

قال اسال

قلت له يا ريس انا كنت متابع خطابك ونفسى اعرف كنت هتقول ايه ومين اللى منعك ؟ يا ريس انا هتجنن نفسى اعرف؟

قالى ده بجد كان هيبقى خطاب تاريخى ولاول مره اكتب الخطاب بنفسى ومن غير ما اسال حد من المستشارين

كنت هتنازل فيه عن الحكم وهفرج عن المعتقلين السياسين وأدعوا لتكوين لجنه من مختلف الفئات والاتجاهات لاعاده كتابه الدستور وعمل انتخابات حره بجد

 لكن بعدكده اكتشفت ان فيه ناس فى الدوله اقوى منى  والوقتى زى ما انت قلت بيسلموه البلد

معقوله يا ريس هو اللى خاطفك؟

ايوه لكن هسالك سؤال انت وصلت هنا ازاى انت مين اللى بعتك؟

واللهى يا ريس انا جاى بالصدفه بس لفت انتباهى الحراسه والفيلا والجامع فضولى خلانى دخلت هنا

سالنى تانى انت كنت بتأيدنى فى الانتخابات ؟

لا

بتلقائيه ومن غير خوف قلت لا

لا

مش عدم الخوف منه علشان مخطوف

لا

لان ده اللى جوايا

معقوله بصراحه كده طيب جامل الراجل ده مخطوف

 بصراحه ما قدرتش أجامل والمفاجئه انه قالى كنت عارف وعارف ان الاغلبيه ضدى 

قلت له وكنت مستنى ايه وانت عارف ان الاغلبيه ضدك؟

قبل ما يرد عليا سمعت صوت جاى من بعييييييييييييييد بيقول ان ما فاقشى خلال 24 ساعه  ننقله للمستشفى المركزى فى العاصمه ونتصل باهله فى مصر

 بصعوبه سألت مين ده

لقيت اصوات مليانه بالفرحه بتقولى حمدا لله على السلامه ايه يا عم هشام خضتنا عليك

بصعوبه فتحت عنيا وسألت هو فيه ايه هو ايه اللى بيحصل عرفتوا مكانه ولا لسه قبل بلبيس  فى المزرعه الحقوه كان هيتنازل عن الحكم ويرد للناس حقوقها 

لقيت دكتور بيسكتنى وقالى ماتتعبشى نفسك بالكلام حمدا لله على السلامه

يومين يا راجل فى غيبوبه احنا كنا فقدنا الامل  الحمد لله انك بخير

يااااااااااااااه يعنى لما يفكر يرجع للحق ويدينا حقنا تطلع غيبوبه يعنى حتى مش حلم ولا حتى كابوس!!!!!!!!!!!!!!!!!! 

 

 

 

 

ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج  |   دوّن الإدراج