باعتراف وزير الدوله للتنميه الاداريه الدكتور احمد درويش ان مصر ولله الحمد وصلت للمرتبه 72

 تسائلت فى ايه قالو فى الفساد طيب 72من كام قالوا154دوله الاكثر فسادا

ودى نسبه مرتفعه جدا سئلت تانى طيب ايه سبب الفساد ده وايه سبب النسبه المرتفعه دى مفيش حد رد عليا ولا عبرنى فسئلت روحى يمكن الاقى رد قعدت مع نفسى افكر يا ترى فعلا الفساد موجود فى مصر وانتشر بالشكل ده افتكرت فى التسعينات واحد من الوزراء قال ان الفساد فى المحليات وصل للركب بس متهيألى ان 72دى فوق الركب بشويه قول كتير مش شويه خصوصا ان فيه35موظف وعامل حكومى بيحققوا معاهم الايام دى علشان مليونيرات وخلى بالك دول 35بس اللى اتكشفوا واتكشفوا امتى لما اتنصب عليهم وراحوا يشتكوا غير كده ما كنا سمعنا عنهم حاجه ده طبعا غير الموظفين الخبراء فى الفساد اللى بيعملوا مشاريع باسماء ولادهم او اسماء شركاء وهميين ودى بالذات منتشره جدا فى مصر يعنى فساد متغطى مش داخل فى المستوى72وطبعا لو اتكشف كنا وصلنا للمربع الذهبى فى الفساد.طيب على مستوى الشارع والمواطن يا ترى احنا شعب فاسد؟

سؤال غبى اوى احنا يا ترى شعب فاسد؟

افتكرت لما كنت فى مصر ازاى كنت بشوف الفساد والرشوه فى كل خطوه بخطيها

افتكرت لما كنت الصبح اروح اشترى عيش من الفرن كان فيه ناس بتدخل تاخد عيش من بره الطابور وطبعا ابو جنيه بجنيه ونصف وعلشان تاخد عيش باقل كميه من المسامير لازم تزود ربع جنيه

ولما كنت اتحشر فى الميكروباص افرح لما اشوف عسكرى المرور واقول هينتقم لينا من السواق اللى حشرنا الحشره الطين دى وكنت ازعل قوى لما اشوف السواق بيسلم على العسكرى افتكرهم قرايب ولما لقيته بيسلم على كل العساكر وبأيده الشمال فهمت انه مش سلام ده رشوه فى ايده وعرفت بعد كده من السواقين المعرفه ان التسعيره جنيه فى كل دور.

سيبك يا راجل من طابور العيش والسواقين والعساكر اطلع فوق شويه احيانا كنت بتعامل مع بعض موظفى الحكومه طبعا لازم تفتح مخك علشان مصلحتك تخلص ولما كنت اقعد مع اى موظف كبير بالصدفه الاقى ان ده امر عادى ومعروف ان المرتب ما بيكفيش فالموظف بيتصرف هو يا نهار اسود دا انا عرفت من موظف كبير ان فيه بعض الموظفين ما بيقبضوش رواتبهم علشان يفضلوا فى اماكنهم وطبعا معروف بتروح فين عند الكبار شويه عنهم

طيب سيبك من الموظفين الغلابه اللى رواتبهم ضعيفه نطلع فوق شويه

نطلع فوق بس مش قوى علشان السقف……….ولا اقول لك اطلع ويلا نكسر اى سقف يقابلنا

اطلع

لما مرشح لمجلس الشعب يدفع له كام مليون رشوه علشان بس اسمه يتحط فى قائمه المرشحين غير كام مليون للى هينجحوه غير كام مليون للدعايه ده لما ينجح هيعمل ايه؟

طيب لما مصنع يتباع بتراب الفلوس فى صفقه مشبوهه بيدعمها وزير كبير فى حكومه الفساد يا ترى فيه كام مليون من تحت الطربيزه ادفع؟

نطلع فوق شويه ؟

نطلع

لما يكون الاغنياء والوزراء وابناء الرؤساء فى مصر يملكو اسطول طيران خاص بيهم اكبر من اسطول مصر للطيران يا ترى ده يبقى فساد ولا ايه النظام وده لما يتحسب نفضل برضه فى المستوى 72ولا نطلع على رأس القائمه؟؟؟؟؟

ياريت كل واحد فينا يرصد مظاهر الفساد حواليه ويرد عليا يا ترى احنا شعب فاسد؟؟؟

اول طريق العلاج هو الصراحه لو اعترفنا بالفساد اللى انتشر وسطنا واللى شاركنا فيه كلنا صغير وكبير  اكيد هنقدر نقضى عليه ونحاربه واكيد هنخلص من شله الفاسديين اللى بتحكم مصر يا ريت نبدأ بالصراحه مع النفس قبل اى حاجه الرجوع لربنا والتطهر من اثار الفساد اللى مغرقنا وبعد كده يبقى من حقنا نحاسب اللى فوق على الكراسى الكبيره ونقدر نسأل عن ارصده سويسرا والمانيا منين جت وهتروح لمين ؟

هنقدر نسأل مبارك عن الارقام السريه لصفقات الاسلحه اللى ما بتزاع ولا حتى على مجلس الشعب بحجه انها اسرار عسكريه مع انك تقدر تعرف من على النت جميع صفقات السلاح اللى اى دوله اشترتها من 10سنين بس من غير ما تعرف ايه هى العموله اللى خبطها المتعاقد او الوسيط المفوض من الدوله وده طبعا فى مصر معروف رأس الافعى الرئيس مبارك

لازم نبدا من تحت من كل شارع من كل حاره نحارب الفساد بكل اشكاله والوانه من غير مبرر ومن غير حجج فارغه تعبنا من الفساد ومن الفاسديين وطول ما احنا فاسديين هيحكمنا فاسديين يا ريت نتحرك بسرعه قبل خراب مصر اكتر ما هى خربانه يا ريت يا ريت……